Rezultatet e zgjedhjeve të 11 qershorit ende nuk janë publikuar zyrtarisht, por Komisioni Qendror i Zgjedhjeve në faqen zyrtare bën me dije se ka arritur të numërojë deri më tani 99,88 për qind të votave.
Në bazë të këtyre rezultateve, del se koalicioni PDK-AAK-Nisma me parti tjera të vogla kanë arritur të sigurojnë 33,98 për qind të votave, duke u renditur e para, Lëvizja Vetëvendosje me 27,12 për qind del e dyta, kurse LDK në koalicion me AKR-në dhe Alternativën kanë siguruar 25,74 për qind të votave duke u rreshtuar si partia e tretë.
Ndonëse votat për deputetë të listave zgjedhore marrin kohë që të dalin në publik, partitë përmes komisionarëve dhe shtabeve zgjedhore i kanë siguruar disa prej rezultateve.
Koha.net, nga burimet e veta brenda KQZ-së, ka mësuar se nga lista e LDK-AKR-Alternativa, si personi më i votuar, pas bartësit të listës dhe të nominuarit për kryeministër, Avdullah Hoti, del të jetë ish-femra më e votuar në zgjedhjet e kaluara, Vjosa Osmani.
Pas saj, besohet se është prurja e re në këtë parti, eksperti i ekonomisë, Lumir Abdixhiku, i ndjekur nga ish-ministri i Kulturës, Kujtim Shala.
Ndërkaq, top-5 besohet se e përmbyll ish-deputeti, Anton Quni.
Për listën e plotë dhe të dhënat e sakta, KQZ-ja besohet se do të dalë pas rreth 2 javësh.