Drejtori i Agjencisë Kundër Korrupsionit, Shaip Havolli është takuar me Ambasadorin e Britanisë së Madhe në Kosovë, Ruairi O’Connell.
Në këtë takim, Havolli e njoftoi diplomatin britanik mbi punën që po bën AKK, të arriturat e saj, por edhe për prioritetet dhe sfidat me të cilat po përballen drejt ndërtimit të një mekanizmi efikas në luftimin e korrupsionit.
Ai me këtë rast vuri theksin te përpjekjet e Agjencisë në forcimin e politikave dhe kuadrit ligjor kundër korrupsionit si një hallkë e rëndësishme në ndërtimin e një shteti të së drejtës.
Havolli ka falënderuar O’Connellin për mbështetjen e vazhdueshme dhe të pakursyer të Britanisë së Madhe në krijimin e një klime anti-korrupsion në Kosovë dhe në fuqizimin e rolit të Agjencisë në përpjekjet e përbashkëta për të luftuar këtë dukuri që po rëndon mbi shoqërinë kosovare.
Nga ana e tij, ambasadori O’Connell i ka garantuar Havollit mbështetjen e parezervë në punën dhe angazhimet e Agjencisë në parandalimin dhe luftimin e korrupsionit dhe shprehi gatishmërinë e Ambasadës së Britanisë së Madhe për thellimin e bashkëpunimit me qëllim të zhvillimit të politikave efikase kundër korrupsionit dhe përmbushjen me sukses të misionit dhe objektivave të saj.
