Delegacioni i Komisionit për Punë të Jashtme, i kryesuar nga kryetari i Komisionit Elmi Reçica, dhe anëtarët Puhie Demaku e Cerim Bajrami, në vazhdën e takimeve gjatë vizitës zyrtare në Parlamentin Evropian në Strasburg, në pasditen e 13 dhjetorit 2016, zhvilluan takime të ndara me eurodeputetët znj. Tanja Fajon, anëtare e delegacionit për marrëdhënie me Kosovën e Bosnje e Hercegovinë dhe Eduard Kukan, udhëheqës i grupit punues për Ballkanin Perëndimor .
Delegacioni ynë gjatë këtyre takimeve njoftoi eurodeputetët lidhur me zhvillimet aktuale në Kosovë, në mes tjerash për ndërtimin e murit në Mitrovicë, për angazhimet në luftimin e korrupsionit, të terrorizmit, për çështjen e demarkacionit, si kritere të rëndësishme për integrimin e shtetit të Kosovës si dhe për interesimin e saj për anëtarësimin në organizata ndërkombëtare, UNESCO e INTERPOL, si dhe në nismat rajonale, ku Kosova mund të japë një kontribut të veçantë.
Eurodeputetët Fajon dhe Kukan duke theksuar se janë të angazhuar për situatën në Kosovë dhe se janë në dijeni për aktualitetet, shprehën gatishmërinë për mbështetjen e plotë të Kosovës në procesin e liberalizimit të vizave. Njëkohësisht shprehën qartë mendimin e tyre se institucionet e Kosovës duhet t’i përmbushin kriteret dhe obligimet e përcaktuara për liberalizim të vizave, duke shtuar se tani është koha e domosdoshme që të veprohet në përmbylljen këtij procesi ngase prolongimi i përmbushjes së kritereve të përcaktuara, do të qoj në kohëzgjatjen e afatit të liberalizimit të vizave për qytetarët e Kosovës.
Para përfundimit të vizitës delegacioni u takua edhe me eurodeputeten Ulrike Lunacek nënkryetare e Parlamentit Evropian dhe nënkryetare e delegacionit për marrëdhënie me Kosovën dhe Bosnje e Hercegovinën të cilin takim e vlerësoi shumë produktiv dhe domethënës, për shtetin e ri të Kosovës.
Delegacioni ynë gjatë këtyre takimeve u shprehu mirënjohje eurodeputetëve për kontributin dhe angazhimin e tyre për Kosovën, duke theksuar se Kosova është shtet proevropian andaj në këtë drejtim pret edhe më tej mbështetjen evropiane. Delegacioni po ashtu i falënderoi euro deputetët për miratimin e rezolutave nga PE, që janë në interes të Kosovës.
Deputetët e Parlamentit Evropian gjatë takimeve shprehën gatishmërinë që të mbështesin proceset integruese të Kosovës për aq sa do të kenë mundësinë, duke kërkuar nga institucionet e Kosovës që edhe ato të përmbushin obligimet dhe kriteret e tyre të brendshme.
