Mërgim Mavraj mbetet një nga pikat më të forta të Kolnit në fazën mbrojtëse dhe këtë e konfirmojnë përveçse rezultatet e kësaj skuadre, edhe statistikat individuale të lojtarëve.
Portali gjerman “Sportschau.de”, i specializuar në përpunimin e shifrave, ka zbuluar se mbrojtësi shqiptar ka spikatur me ndërhyrjet që ka bërë në javën e 11-të të Bundesligës, në ndeshjen mes Borussia e Monchengladbahut dhe Kolnit 1-2.
Në tabelën ku listohen futbollistët që kanë fituar me shumë duele 30-vjecari renditet i pari me 91. Për qind të ndërhyrjeve të sakta, ndjeshëm i shkëputur nga ndjekësit më të afërt. Kjo statistikë sugjeron se futbollisti i kombëtares shqiptare praktikisht ka qenë perfekt në ndërhyrje.
I dyti vjen Bastian Oczipka i Eintrahtit të Frankfurtit me 85.7 për qind të ndërhyrjeve të sakta, ndërsa më pas vjen Diekmeier i Hamburgut me 84.6 për qind.
Plotësojnë tabelën e gjashtë më të mirëve Kimisch i Bayernit Munichut, Abraham i Eintrahtit Frankfurtit dhe Vestergaard i Borussia Moenchengladbahut.
Saktësia në ndërhyrje e Mavrajt konfirmohet edhe nga statistikat që ai ka me Kolnin në këtë sezon. Është aktivizuar titullar në të gjitha ndeshjet e Bundesligës dhe nuk është zëvendësuar në asnjë rast.
Edhe më interesant është fakti që në 11 takime të kampionatit është ndëshkuar vetëm në një rast me karton të verdhë, pikërisht në humbjen 1-0 me Eintrahtin e Frankfurtit. Praktikisht një mbrojtës perfekt.
