Dy arinjtë të cilët mbaheshin në robëri në Sarandë, janë nisur drejt qendrës së Shpëtimit në Leinefelde – Worbis Gjermani.
Lajmi bëhet i ditur nga Ministria e Mjedisit e cila në në bashkëpunim me Shoqatën Animal Rescue Albania (ARA) kanë bërë të mundur dërgimin në Gjermani të dy arinjve më të vegjël se 6 muaj të cilët u konfiskuan në Sarandë në fillim të Gushtit 2016.
Mbasi u konfiskuan nga Inspektorati Shtetëror i Pyjeve arinjtë u dërguan në Kopshtin Zoologjik Tiranë dhe në datën 30 shtator u pagëzuan me emrat Rocki dhe Smocky.
Transporti u realizua ditën e sotme nga Kopshti Zoologjik drejt aeropotit të Rinasit. Bashkë me transportuesit ishin të pranishëm edhe veterinerët e huaj të cilët asistuan në të gjitha procedurat e nevojshme.
Pas aktit të konfiskimit, Ministria e Mjedisit ka përgatitur të gjithë dokumentacionin e nevojshëm për transferimin e arinjve, përfshi këtu dhe përgatitjen e lejes CITES.
Bashkë me dy arinjtë e vegjël, numri i arinjve që janë shpëtuar nga robëria dhe janë dërguar në qendra strehimore apo janë në proces dërgimi arrin në 15.
