Shqetësimet për gjendjen shëndetësore të Hillary Clinton pas incidentit të ndodhur gjatë ceremonisë përkujtimore të sulmeve të 11 shtatorit, kanë nxitur spekulime lidhur me një “Plan B” të Partisë Demokratike.
Kjo ka ngritur pyetjen sesi do të funksionon zëvendësimi i saj në garën elektorale për zgjedhjet presidenciale që do të mbahen me 8 nëntor.
Në bazë të rregullave të Partisë Demokratike, ajo duhet të thërrasë Konventën Kombëtare të Nominimit që zgjedh kandidaten për presidente dhe zv.presidente.
Nëse Clinton do të tërhiqej vullnetarisht, atëherë do të kishte një mbledhje emergjente të Konventës.
Në një kohë kur flitet se gjendja e saj shëndetësore nuk është aq shqetësuese sa të tërhiqet nga gara, shumë të tjerë thonë se Demokratët kanë që tani një kandidat zëvendësues.
Bernie Sanders, Joe Biden dhe Elizabeth Warren mund të jenë zëvendësuesit e mundshëm të ish-Sekretares së Shtetit.
Një rast i ngjashëm ka ndodhur në vitin 1972, kur Demokratët tërhoqën kandidaturën për zv.president pasi rezultoi se kishte kryer trajtim për sëmundje mendore.
