Bisedimet Prishtinë – Beograd kanë vazhduar edhe gjatë ditës së djeshme në Bruksel.
Njëra ndër temat e diskutuara ka qenë edhe rivitalizimi i urës mbi lumin Ibër dhe është arritur dakordimi që procesi të vazhdojë sipas dinamikës së paraparë.
Kryetari i Komunës së Mitrovicës, Agim Bahtiri, në një prononcim për Veriu.info nga Brukseli, ka treguar se është dakordim i të gjitha palëve që Ura e Ibrit të hapet në janar.
“Ne nuk kemi pranuar në asnjë formë të diskutohen kufijtë administrativ, pasi që ata janë të përcaktuar me Planin e Ahtisaarit dhe nuk do të dilet prej tij. Për këtë ka edhe dakordim nga ndërkombëtarët. Pra, fshati Suhodoll dhe fshatrat përreth do të mbeten me Mitrovicën e jugut, ashtu siç është e paraparë me Planin e Ahtisaarit”, ka thënë Bahtiri.
Ai ka treguar se me qëllim të qarkullimit më të sigurt të këmbësorëve, për shkak të punimeve mbi urë, javën e ardhshme do të hapet, ashtu siç është e paraparë me projekt, një urë e përkohshme për kalimin e këmbësorëve ngjitur me Urën e Ibrit.
“Është arritur pajtimi që mbikëqyrës të punimeve mbi Urë të jemi ne kryetarët e jugut dhe veriut, por edhe kompania e kontraktuar, në mënyrë që punët të kryhen me kohë dhe ura të hapet në janar”, theksoi kryetari Bahtiri.
Ai ka porositur qytetarët e jugut dhe veriut që të qëndrojnë të qetë, sepse gjithçka po vjen në vendin e duhur për të mirën e gjithë qytetarëve.
