Në Rripin e Gazës është inauguruar këtë javë një mural, si përpjekje për të vënë në dukje krizën e shtuar për ujë në territoret palestineze.
Pesë artistë kanë marrë pjesë në punimin 25 metra të gjatë, i cili është financuar nga Fondi për Fëmijë i Kombeve të Bashkuara (UNICEF).
“Po bëjmë përpjekje për të gjetur një zgjidhje për problemin me ujë në Rripin e Gazës”, deklaroi drejtori i Ndërmarrjes për Ujë, Monther Shublaq, gjatë ceremonisë së mbajtur.
Që nga viti 2007 Rripi i Gazës po përballet me një bllokadë jonjerëzore nga ana e Izraelit, i cili ka privuar 1.9 milion banorët e Gazës nga nevojat themelore përfshirë ushqimin, karburantet dhe ilaçet.
Si pasojë e rrethimit gati një dekadë, është dëmtuar rëndë infrastruktura ujore e cila është pranë shkatërrimit.
Shublaq tha se burimet ujore të Palestinës janë nën kontroll të Izraelit. “Kjo është arsyeja kryesore e problemit me ujë në Rripin e Gazës”, tha ai, duke akuzuar Izraelin se po ndalon hyrjen e pajisjeve të nevojshme për të zbatuar projektet e ujit.
