Kryeministri: AAK kishte kërkuar rezolutë për caktimin e kufijve në bazë të vitit 1974

Kryeministri i Kosovës, Isa Mustafa nëpërmes një postimi në llogarinë e tij në Facebook ka thënë se me sponzorizim të AAK-së, Kuvendi i Kosovës ka nxjerrë Rezolutë për caktimin e kufijve në bazë të Kushtetutës së vitit 1974.

Ai ka cituar atë Kushtetutë, ku sipas Mustafës, Kosova ka sipërfaqe 10908 kilometra katror dhe Komuna e Pejës 603 kilometra katror, aq sa ka edhe sot.

“Shpresoj se deputetët e AAK-së do ta kenë lexuar Kushtetutën e Krahinës Socialiste Autonome të Kosovës, e cila në Pjesën e parë, Dispozitat e Përgjithshme, neni 3 thotë si vijon: ‘Territorin e Krahinës Socialiste Autonome të Kosovës e përbëjnë territoret e komunave të tanishme’…. Pra rezulton qartë se ajo që neve kemi trashëguar sipas kësaj Kushtetute si territor të Kosovës ka qenë territori i 22 komunave, sa kishte atëherë Kosova. Në qoftë se mblidhet territori me numra të rrumbullakuar, sipas Vjetarit statistikor 1980, fq.440 rezulton se sipërfaqja ishte 10908 km katror, kurse Komuna e Pejës kishte 603 km katror, sa ka edhe sot”, shkruan Mustafa.

Ai më tej ka thënë se si kryeministër, por edhe si kryetar i LDK-së do të komunikojë me qytetarët për t’i informuar për këtë proces.

“Si Kryeministër i Vendit dhe si Kryetar i LDK-së do të bëjë çdo gjë që të komunikoj me qytetarët e mi dhe të sqaroj çdo të dhënë me të cilën disponoj, jo vetëm si bartës i këtyre pozitave por edhe si profesor dhe akademik, për të mos lënë hapësirë që Kosova të humb asnjë metër katror nga ajo që me Deklaratën e Pavarësisë jemi zotuar për territorin e Kosovës”, përfundon Mustafa.

Temat
LajmeVend

Të afërta