Burim Ramadani është emër i njohur dhe publik në Kosovë. Ai deri vonë ka qenë i angazhuar në politikë, kurse aktualisht është fokusuar në shoqërinë civile, ku jep kontribut të madh si ekspert i sigurisë. Në intervistë dhënë për portalin bebaime.com ai flet për bashkëshorten, dy fëmijët dhe shumë gjëra interesante që nuk i keni ditur për familjen e tij.
“(Bashkëshortja) Lena dhe unë jetojmë së bashku tashmë gati pesë vjet, në Prishtinë, me dy fëmijët, ndërsa vikendet e zakonshme janë në Suharekë te prindërit dhe vëllai im. Jemi takuar në ditën e parë të vitit 2011 dhe pastaj jemi martuar në fund të po atij viti. Lena është arkitekte me profesion bazik dhe magjistrante e ekonomisë, ndërsa angazhimi i saj në vitet e fundit është në vetëpunësim. Ajo udhëheq një prej kompanive të suksesshme në dekorim të ditëlindjeve dhe ngjarjeve tjera”, është shprehur Ramadani.
Ai ka treguar se vajza Ana është katër vjeçe, kurse djali Lumi, dy vjeç. “Janë engjëjt e shtëpisë. Janë jashtëzakonisht të dashur”, ka thënë ai duke shkruar se momenti kur është bërë babë është ndjenjë “jo lehtë e përshkueshme, një ndjenjë e paprovuar ndonjëherë, një ndjenjë e paimagjinueshme”.
“Prandaj, nuk mund t’i kuptoj assesi ata prindër që nuk kanë përgjegjësi ndaj fëmijëve. Që mirëqenien e familjes dhe fëmijëve e rrezikojnë në qejfet e veta të shfrenuara. Kurrë nuk do të arrij t’i kuptoj e as t’i mirëkuptoj fare.
