Ndonëse të premten deputetët e Kuvendit të Kosovës miratuan me shumicë votash projektligjin për ratifikimin e marrëveshjes ndërkombëtare mes Kosovës dhe BE-së mbi misionin e EULEX-it edhe për dy vite, zyrtarisht ky mision ende nuk ka mandat.
Mirëpo, vonesa për vazhdimin e mandatit të EULEX-it ka bërë që seancat e planifikuara gjyqësore të mos mbahen në afatin e paraparë, transmeton Indeksonline.
Avokati i njohur, Arianit Koci ka thënë për Indeksonline se pas publikimit të lajmit ka marr një telefonatë nga zyrtarët e EULEX-it të cilët ia kanë konfirmuar një gjë të tillë.
“Në këtë moment mora një thirrje nga zyrtarët e EULEX-it dhe më informuar që seanca gjyqësore e caktuar për ditën e nesërme është anuluar”, ka thënë Koci.
Ai ka përsëritur se edhe pse ligjet për vazhdimin e mandatit të EULEX-it, ndonëse janë votuar në Kuvendin e Kosovës, ato nuk hyjnë në fuqi pa u publikuar në Gazetën Zyrtare.
“Deri më tani ende nuk janë publikuar, prandaj, EULEX-i ende nuk ka mandat”, ka theksuar Koci.
