Komisioni Shtetëror i Maturës (KShM), ka konstatuar se pjesa e dytë e Maturës Shtertërore është organizuar dhe administruar mjaft mirë, duke ruajtur kredibilitetin e një procesi real dhe të rëndësishëm.
Prandaj, KShM ka shprehur mirënjohjen dhe falënderimin e saj për nxënësit, administruesit, mbikëqyrësit dhe kryetarët e qendrave të testimit, si dhe të gjithë pjesëmarrësit tjerë në këtë proces.
Sipas një kumtese të Ministrisë së Arsimit, kryetari i KShM-së, Azem Guri theksoi se në testin e sotëm kanë marrë pjesë 32.150 nxënës në të gjitha komunat e Republikës së Kosovës në 252 qendra testimi dhe rreth 3.000 administratorë, mbikëqyrës dhe staf tjetër zyrtar.
“Është për t’u vlerësuar se përgatitjet e bëra kanë rezultuar të suksesshme: testi ka filluar me kohë, nuk ka pasur mungesa të testeve në asnjë qendër testimi, administratorët dhe kryetarët e qendrave të testimit kanë arritur me kohë në çdo qendër dhe i tërë procesi ka përfunduar në kohën e paraparë”, tha ai, transmeton Telegrafi.
Guri përmendi se me gjithë suksesin e treguar në këtë raund të testimit, KShM është e vendosur që rastet e izoluara ku është konstatuar kopjim apo shkelje të veçuara gjatë administrimit, do të merren masa sipas Ligjit ndaj të gjithë atyre që nuk i kanë përmbushur detyrat dhe obligimet me të cilat janë ngarkuar.
Kryetari i KShM-së theksoi se ekspertët, administratorët dhe mbikëqyrësit tanë, bashkë me drejtorët komunalë, këshillin rinor, këshillin e prindërve, mediet dhe policinë, si dhe akterët tjerë të përfshirë në proces, i kanë identifikuar dhe evidentuar rastet e abuzimit dhe kopjimit dhe për pasojë në rastet e vërtetuara do të anulohet Provimi.
KShM, sipas Gurit, do të veprojë në zbatim të ligjit duke ndërmarrë masa dhe veprime që e ruajnë standardin dhe kredibilitetin e testimit real, të besueshëm dhe korrekt.
Guri falënderoi edhe mediat, të cilat e kanë përcjellë procesin e sotëm dhe kanë dhënë kontributin e tyre në mbarëvajtjen e këtij procesi.
