Ministri i Ambientit dhe Planifikimit Hapësinor, Ferid Agani, ëeshtë shprehur se plani për ndërtimin e një kompleksi në Zveçan, pa lejen e Prishtinës zyrtare, është provokim i Qeverisë së Serbisë.
Gjatë një interviste të dhënë në Ballë për Ballë të Klan Kosovës ka thënë se serbët janë duke e keqpërdorur diskriminimin pozitiv që po u bëhet nga Kosova dhe se për çdo ndërtim, kudo në Kosovë, duhet përfillur rregullativa në fuqi.
“Do t’ua bëjmë me dije se një projekt i tillë nuk është i zbatueshëm. Nuk mund të lëshohet asnjë leje ndërtimore pa dokumentet përkatëse”, ka thënë ai. Agani nuk e ka mohuar mundësinë e rrënimit të objekteve nëse nuk arrihet dakordim, por ka shtuar se më parë do të tentohet që gjithçka të zgjidhet me dialog.
“Është i paraparë edhe rrënimi, por nuk kemi nevojë që ta themi fjalën e parë, të fundit. Mendoj që kemi kapacitete ligjore dhe komunikim të vendosur me komunat në veri të vendit. Mendoj që ky është proces që mund të menaxhohet. Për fat të keq disa nga kolegët tanë, në Qeveri, janë bërë pjesë e provokimit të Qeverisë së Serbisë. Unë kam insistuar që në çdo cep të Kosovës ku bëhet kthimi i qytetarëve, të bëhet në pajtim me ligjin. Duhet edhe ministrat , por edhe qytetarët e veriut, ta kenë të qartë se vendi ku duhet t’i zgjidhin problemet e tyre është Prishtina”, ka thënë Agani. /albeu/
