Deputeti i Nismës për Kosovën, Enver Hoti, ka thënë se karshi dy ekstremeve që në njërin qëndron koalicioni qeverisës dhe në tjetrin Lëvizja Vetëvendosje, vetëm binomi AAK-Nisma janë në racionalitetin e duhur në skenën politike kosovare.
“Tani kemi tre pole, Vetëvendosja që po thirret si më e madhja në opozitë dhe në anën tjetër PDK-LDK si dhe AAK-NISMA. Të parët nuk i njohin të arriturat e vendit dhe kjo është shqetësuese për Aleancën dhe Nismën. PDK- LDK janë nënshtruar plotësisht dhe po qeverisin keq, dhe karshi këtyre dy ekstremeve qëndron Aleanca dhe Nisma që i njeh të arriturat e vendit, por nuk është e gatshme të lëshoj pe në marrëveshjet e arritura nga pushteti”, ka thënë Hoti në Info Magazine të Klan Kosovës.
Ndërsa sa i përket kthimit në Kuvend, AAK e Nisma nuk kanë ndërruar mendje.
“Është e drejtë e Vetëvendosjes të kthehet në Kuvend, por ne si Nismë dhe Aleancë mendojmë që zgjidhja e vetme është shkuarja në zgjedhje”, tha ai.
Hoti ka kritikuar koalicionin qeverisës dhe politikat e tyre, sidomos për Demarkacionin me Malin e Zi.
“Deputetët e koalicionit nuk janë në përgjegjësinë e duhur, arsyet se nuk ka material për demarkacion, ka materiale dhe punime shkencore që jo vetëm vë në pyetje komisionin shtetëror, por dëshmojnë punën e tij si të gabueshëm”.
“Nuk kam aspak besim që këta deputetë të koalicionit qeveritar që shpesh kanë ndërruar mendim kur i është thënë nga shefat e tyre, do të ndryshojnë diçka” tha Hoti.
