Pensionistët kosovarë përveç se duhet të presin në radhë për të marrë pensionin dhe të lajmërohen çdo gjashtë muaj për të vërtetuar nëse janë ende në jetë, u është shtuar edhe një obligim tjetër.
Me Ligjin për skemat pensionale të financuara nga shteti dhe akte të tjera nënligjore tash e tutje atyre u kërkohet edhe një vërtetim për tatim mbi pronë, me të cilin dëshmohet adresa e saktë e vendbanimit të shfrytëzuesit të pensionit, shkruan sot “Koha Ditore”.
Kjo ka bërë që shumë prej tyre të hënën të presin para sporteleve në Komunën e Prishtinës, për të marrë një vërtetim për tatim mbi pronë. Sipas Ministrisë së Punës dhe Mirëqenies Sociale, kjo po bëhet për shkak të evitimit të keqpërdorimeve, teksa për pensionistët kjo ishte habi.
Por pensionistët thonë se askush nuk i ka lajmëruar se duhet të kenë edhe një vërtetim të tillë në kohën kur duhet të lajmërohen se ende janë gjallë, në zyrën e Departamentit të Pensioneve. Sipas tyre, një gjë e tillë nuk i është kërkuar më herët.
