Nënkryetari i Aleancës për Ardhmërinë e Kosovës, Ahmet Isufi thotë se si opozitë do të vazhdojnë të kundërshtojnë marrëveshjen aktuale të demarkacionit mes Kosovës dhe Malit të Zi.
Ai në emisionin “Kontakt” me Valdrin Krasniqin në Tribuna Channel ka thënë se presidenti i vendit Hashim Thaçi mund të mos e këtë çështjen e hapur me Malin e Zi sa i përket demarkacionit, por janë qytetarët ata që e kanë dhe po e kundërshtojnë në vazhdimësi.
“Kemi të bëjmë me reagim të qytetarëve të asaj zone dhe janë shumë qytetarë që po e kundërshtojnë. Është dëmtim i interesit shtetëror dhe po ashtu lë edhe konflikt. Nuk e dimë pse kjo ngutje nga presidenti, kryeministri dhe nga kjo qeveri e kriminalizuar”, ka deklaruar Isufi në “Kontakt”.
Ai konsideron se duhet të bëhet rishikim i marrëveshjes së demarkacionit.
“Meqë Mali i Zi po ofrohet për rishikim pse këta po këmbëngulin, kjo të bënë me dyshua”, ka thënë ai.
Në rast që kjo marrëveshje siç është në versionin e tanishëm shkon në Kuvend, Isufi thotë se do ta kundërshtojnë në mënyrë demokratike pasi nuk dëshirojnë ta dërgojnë vendin në konflikt.
“Çdo deputet që e donë vendin e vet duhet ta dijë që fëmijëve të tyre do ju lënë konflikt”, ka thënë ai.
Ai ka folur edhe sa i përket bashkimit të opozitës për kauzat. Flet për liberalizimin e vizave dhe për çështje të tjera.
