Kryetari i Kuvendit të Kosovës, Kadri Veseli, priti sot në takim përfaqësuesit e një grupi specializantësh të mjekësisë.
Në takim u bisedua për problemin me të cilin janë duke u ballafaquar rreth 300 specializantë, të cilët kryejnë shërbimet e tyre në sistemin shëndetësor dhe prej dy vitesh nuk marrin asnjë lloj kompensimi financiar.
Kryetari Veseli gjatë takimit theksoi se do të angazhohet maksimalisht në gjetjen e zgjidhjes se kësaj situate të papranueshme, duke thënë se “problemi juaj të nderuar specializantë është pjesë e faktit se ne kemi një sistem shëndetësor të dështuar. Ne kemi mjekë të shkëlqyeshëm, profesionalisht të barabartë me kolegët e tyre ndërkombëtarë, të përkushtuar maksimalisht në misionin e shenjtë të mjekësisë, por po i humbim këta mjekë për shkak të një sistemi të mbrapshtë e të dështuar të shëndetësisë”.
Më tutje, Veseli theksoi se “ky sistem shëndetësor është njëkohësisht duke varfëruar popullatën tonë, sepse si pasojë e tij miliona euro të qytetarëve tanë përfundojnë në spitalet e vendeve të huaja, por edhe duke e varfëruar profesionalisht mjekësinë tonë, sepse duke mos u kushtuar kujdes kuadrove që krijohen me aq mund e sakrifica familjare, këto kuadro detyrohen të gjejnë rrugët e largimit nga Kosova”.
“Është moment i fundit që të ndërhyjmë dhe t’i japim fund keqmenaxhimit dhe improvizimit në mjekësinë kosovare”, tha ai.
