Kreu i ekzekutivit në Kosovë, Isa Mustafa, ka qëndruar të shtunën për vizitë në Istog. Nga atje, Mustafa ka shpalosur qëndrimet e tij lidhur me zhvillimet në vend dhe protestën e opozitës në Prishtinë.
Sipas tij, më mirë do të ishte që sot në Prishtinë të kremtohen fitoret që i ka arritur Kosova gjatë këtij muaji, përfshirë rekomandimin për liberalizimin e vizave, anëtarësimin në UEFA, në FIFA dhe proceset tjera.
Mirëpo, siç u shpreh kryeministri Mustafa, protesta është çështje legale, e garantuar me Kushtetutë si shprehje e mendimit të qytetarëve dhe opozitës.
Sa i përket kërkesës për dorëheqje të Qeverisë, ai ka thënë Qeveria do ta çojë mandatin deri në qershor të vitit 2018, sepse kjo është “një Qeveri e cila po tregon suksese shumë të mëdha në proceset e integrimeve euroatlantike, të thellimit të miqësisë me ShBA-të, të reformave strukturore e ekonomike”.
Mustafa shprehu përkushtimin për bashkëpunim me opozitën, që bashkërisht të zgjidhen preokupimet dhe nevojat e qytetarëve.
“Vota nuk është vetëm e pozitës, është edhe e përfaqësuesve të opozitës. Ata kanë të drejtë të bëjnë kërkesa, kanë të drejtë të korrigjojnë pozitën. Unë i ftoj që të kthehen në Kuvend, që të bashkëpunojmë, që të japin vërejtjet aty”, tha Mustafa. /Telegrafi/
