Kryeministri i vendit, Isa Mustafa ka deklaruar se luftimi i korrupsionit dhe ratifikimi i marrëveshjes për demarkacionin me Malin e Zi, janë dy kushtet që duhet përmbushur para se të lëvizim pa viza. Për demarkacionin, tha se ratifikimi i marrëveshjes duhet të ndodh.
Mustafa në mbledhjen e Qeverisë së Kosovës, përgëzoi qeverinë për rekomandimin për liberalizimin e vizave dhe ministritë që kanë punuar në këtë fushë.
“Dëshiroj të shpreh falënderime për Kuvendin sepse i kemi përshpejtuar disa procese për të plotësuar kriteret, është hap i rëndësishëm, vendim historik nga Komisioni Evropian. Janë dhënë edhe dy kushte të cilat ne duhet t’i plotësojmë, ratifikimi i marrëveshjes me Malin e Zi, si çështje nuk duhet relativizohet, duhet ratifikimi të ndodh. Mbetet një çështje që ne duhet ta adresojmë. Kjo nuk mund të mbetet çështje individuale apo një partie politike, si i tillë duhet të ndodh. Çështje tjera si lufta kundër korrupsionit, Qeveria ka treguar përkushtimin e vet dhe jam i bindur se edhe në këtë aspekt do të tregohemi të suksesshëm dhe përfundimisht ta marrim votën për lëvizje të lirë”, tha ai.
