Granit Xhaka do të transferohet në ndonjë skuadër tjetër vetëm nëse paguhen 40 milionë euro. Vlera e mesfushorit shqiptar është rritur pas kualifikimit të Borussia Moenchengladbachut në Ligën e Kampionëve për edicionin e ardhshëm.
“Klauzola e lirimit për Xhakën është 40 milionë euro. Interesimi më i madh është nga Arsenali që është i gatshëm të paguajë rreth 40 milionë euro”, ka shkruar Sport1, përcjell Koha Ditore.
“Edhe Xhaka ditë më parë nuk ka garantuar nëse edhe edicionin e ardhshëm do të jetë pjesë e skuadrës”, vazhdon shkrimi duke shtuar se 23-vjeçari ka thënë se vendimin do ta marrë së bashku me klubin.
“Vendimi nuk do të jetë vetëm imi. Unë mund të them se jam me të vërtetë i lumtur në Borussia Moenchengladbach. Kam kontratë deri në vitin 2020, por nëse ka ndonjë ofertë do ta shohim së bashku me zyrtarët e klubit. Le të shohim se çfarë do të ndodhë”, citohen fjalët e lojtarit që e përfaqëson Zvicrën.
