Është e natyrshme që të shqetësohesh kur ke probleme të zonës intime, pasi edhe shenjat e vogla, ndonjëherë mund të degradojnë në sëmundje të rënda nëse nuk trajtohen në kohë.
Por, gjithkujt mund t’i shkojë mendja që shkaktar i këtyre problemeve mund të jetë pikërisht letra higjienike. Ja për çfarë duhet të bëni kujdes:
Mikroprerjet
Fshirja në mënyrë të ashpër, me një letër po ashtu të ashpër, mund të shkaktojë prerje të vogla në pjesën e vulvës. Lëkura në këtë zonë është tepër delikate, ndaj duhet të tregoheni të kujdesshme gjatë fshirjes sepse këto të prera mund të krijojnë infeksione. Madje më mirë të tampononi sesa të fshini.
Infeksionet e traktit urinar
Mund të duket e çuditshme që një produkt i tillë të shkaktojë infeksion të traktit urinar, por kështu është. Uretra (vendi nga ku del urina) është e shkurtër dhe baktereve nuk u duhet të udhëtojnë shumë gjatë për të arritur në fshikëz. Kur pastroheni nga pas-para, mund të zhvendosni papastërti nga zona e anusit drejt uretrës dhe kështu të kontribuoni në krijimin e një infeksioni. Prandaj, rekomandohet që fshirja të bëhet nga para-pas, ose thjesht tamponim.
Enjtja
Disa lloje letrash higjienike kanë parfume, bojë dhe kimikate të tjera që mund të irritojnë lëkurën dhe të shkaktojnë enjtje në zonën intime. Kjo ndodh veçanërisht me letra që kanë zbardhues.
Infeksione mykotike
Parfumet e letrave higjienike, apo edhe kimikatet e tjera, mund të shkaktojnë zhbalancimin e PH-it në vaginë dhe të çojnë në krijimin e një infeksioni mykotik. Nëse e keni këtë shqetësim, zgjidhni një lloj letre higjienike hipoalergjike.
