I pari i Kryeqytetit ka vazhduar ta akuzojë kryetarin e Gjykatës Themelore të Prishtinës Hamdi Ibrahimi se po nxitë banorët e Dardanisë t’i shkojnë tek shtëpia e Shpend Ahmetit pas dëbimit të tyre nga banesat e uzurpuara në Prishtinë.
Ahmeti në një reagim tjetër në facebook ka treguar se Komuna s’do të ofrojë strehim për të gjithë banorët në fjalë, pasi sipas tij nuk përbejnë rast social dhe ka nga ata që marrin edhe nga dy paga. Strehim, sipas Shpend Ahmetit do tu ofrohet vetëm 7 familjeve të dëbuara nga banesat e uzurpuara në Dardani, me gjendje të rendë ekonomike, dhe tre tjerave me fëmijë me nevoja të veçanta.
Ky është shkrimi i Shpend Ahmetit në facebook:
Në një vend si Kosova, kryetari i Gjykatës e cila ka marr vendim në vitin 2008 ju thotë dhe i nxit që të shkojnë te shtëpia e kryetarit të kryeqytetit për të mos zbatuar vendimin që e kanë nxjerr vetë.
E vërteta po del dhe do të del në shesh dita ditës e do të shihet se kush çfarë ka bërë. p.sh që në ditën e parë të lirimit të banesave, nga 6 të liruara në tre prej tyre ishin studentë me qera, ka shitblerje të këtyre banesave, familjarë të politikanëve e deri te politikanë të fortë që kanë shpërnda banesa në vitin 1999. Por kjo le ti mbetet organeve kompetente për shqyrtim.
E keqja është që një grup i vogël i njerëzve në hall po instrumentalizohen për sulme politike. E Komuna e Prishtinës po vazhdon me punën e vetë. Gjatë këtyre ditëve janë vlerësuar se shtatë familje janë në gjendje më të rëndë sociale, dhe tre të tjera me fëmijë me nevoja të veçanta. Komuna e Prishtinës qe një kohë ka filluar procedurat për strehimin në vende të tjera ku ka mundësi.
Por strehim nuk mund të ju ofrohet atyre me dy paga, atyre që marrin qera prej studentëve e politikanëve të pasur.
