Në replikë me kreun e ALUIZNI-t, Artan Lame, ka reaguar sërish ish ministri i Drejtësisë, Ylli Manjani
Në një reagim të gjatë në profilin e tij në Facebook, Manjani e shikon në një këndvështrim tjetër çështjen e të moshuarës në Berat, e cila denoncoi live përpara kryeministrit Rama skandalin që i kishte ndodhur prej 5 vitesh për marrjen e një leje legalizimi. Manjani thotë se ajo është një kavie e përdorur nga qeveria, ku në të vërtetët sipas ish ministrit të Drejtësisë përgjegjësia duhet të jetë individuale dhe jo kolektive deri në shkrirje të zyrës.
Statusi i plote
Një përgjigje për Lamen dhe jo vetëm.
Lame,
Je pak konfuz në arsyetim! Më lë të kuptoj se “s’ke ç’ti bësh gomarit dhe i bie samarit”! Bjeri atij të shkreti gomar ndonjëherë, siç bëje dikur! Mos më nxirr arsye për këtë!
Nejse, fundja bjeri kujt të duash edhe samarëve që kanë vënë partitë (PS e para) në administratë! Ti e di që unë jam gjithmonë kundër samarëve që vetëm mbrojnë gomerët që i vënë se për tjetër punë nuk janë!
Por hallin e kam tek ajo “plaka mediatike”. Ti e di shumë mirë që zgjidhja e hallit të saj shkakton halle tek fqinjët e saj! Ndaj dhe samari (pra zyra e ALUIZNIT) kish hezituar të çelte një sherr ndërmjet fqinjësh! Kishte një letërkëmbim të gjatë kjo çështje. Kishte dhe letra të firmosura nga ti.. Pra plakën nuk e kishit lënë pa përgjigje. Por halli i saj mediatik bëri që ato letrat të shumëzoheshin me zero.
Plaka u be mediatike, sepse ajo u përdor si standart i degjenerimit të shtetit në publik. Udhëheqësi, që e paçi sa malet, e bëri atë plakë kavje mediatike për të parë se sa e mbajnë nervat nënpunësin ligjzbatues! Dhe në fakt nuk e mbajtën, duke treguar se sa e madhe është vrima e çorapit që ka krijuar partia-shtet në administratë.
Ti dhe unë ndajmë të njëjtën shkollë të shtetformimit dhe zgjidhja e hallit në media nuk është shtetformim por shtetdhunim!
Pa dyshim që ti je dakort me këtë.
Të kthehem tek rasti i zyrës, shkruan se i kishe “tërhequr vëmendjen zyrës”?!! Vëmendja i tërhiqet drejtuesit more, jo ndërtesës e as kolektivit!!!
Përgjegjësia ligjore është individuale jo kolektive!!
Përgjegjësia quhet kolektive, kur zbulohet ndonjë grup kriminal i strukturuar!!! E jo për të justifikuar drejtorin hajt ti biem zyrës!
Përgjegjësitë kolektive janë sindroma të këqia, ti më mirë se kushdo e di! Sa raste nga historia e komandatit ke rrëfyer me përgjegjësi kolektive?!
Është e keqe kjo gjë o Lame! Shumë e keqe! Unë nuk të akuzoj ty si ndjekës i komandatit, por praktika që ke firmosur i shërben vetëm kultit të udhëheqësit, nga i cili ke ditur edhe të ndahesh.
Dhe më në fund, vrimat e çorapeve të administratës do mbyllen vetëm duke i hequr asaj çorapet politike dhe duke i veshur corapet e më të diturve, të mençurve, punëtorëve dhe shërbyesve të përgjegjshëm! Nëse çorapet politike të derisotme do ti zëvendësoni me çorape të reja të që i sjell partia e vetme që qeveris, s’keni mbyllur asnje vrimë, por keni krijuar një gropë! Hoqët tepsinë por krijuat govatën! Natyrisht nuk je ti autori i saj, por nuk dua që te jesh kontribuuesi!
Fillimi është i keq! Drejtorët e rinj që po emëroni (ende jo ti) janë super politikë! Besnikë jo thjesht të partisë por të udhëheqësit!
E që të mos e zgjas më, këshilla ime për ty është të kthehesh tek shtetari! Nuk bëhesh populist ti! Nuk të shkon!
/Gazeta Express/