Lidhja Demokratike e Kosovës, nuk është në kurrfarë pozite për ta kërkuar postin e kryeministrit, tha nënkryetari i Lëvizjes Vetëvendosje, Glauk Konjufca.
“Ne as që e diskutojmë bile… Ata e kishin kryeministrinë për tri vite me radhë. Na treguan çka dinë dhe çka munden. Pikërisht për shkak të kësaj qeverisje, LDK-ja doli në vendin e tretë”, tha Konjufca në emisionin Argument Plus të RTV21.
Ditë më parë zyrtari i LDK-së, Muharrem Sfarqa tha se kjo parti hynë në koalicion me Vetëvendosjen nëse u jepet posti i kryeministrisë, Konjufca tha se atëherë LDK-ja të përgatitet për zgjedhjet e reja.
“As që do të ishte pikë në negociatat e ardhshme me Lidhjen Demokratike të Kosovës. Një porosi të qartë populli e ka dhënë në këto zgjedhje”, përfundoi Konjufca./21Media/
