Javier Mascherano beson se bashkëlojtari i tij te Barcelona, Leo Messi, është më i mirë në histori të futbollit dhe pret që ai të vazhdojë kontratën me klubin katalunas.
Pesë herë fituesi i Topit të Artë, Leo Messi, ende nuk ka rinovuar kontratën me Barcelonën, i cili kërkohet nga shumë klube të mëdha Evropiane, që janë të gatshme të hapin arkat e tyre dhe të paguajnë shuma marramendëse për argjentinasin.
Por, bashkëlojtari i tij te Barcelona dhe Argjentina, Javier Mascherano, nuk mund ta imagjinojë Messin në një skuadër tjetër. Ai shpreson që rinovimin i kontratës të ndodhë sa më shpejt.
“Ai është i vetmi lojtar i domosdoshëm, Messi është i veçantë”, tha Mascherano për Barca Magazine, kur u pyet për kontratën e argjentinasit.
“Po flasim për lojtarin më të mirë në histori të kësaj loje dhe klubit”, shtoi mbrojtësi argjentinas.
“Nuk mund ta shoh Messin të luaj për një skuadër tjetër në nivelet më të larta. Barça dhe Messi janë sikur martesa, të cilët kanë qenë të lumtur për një kohë të gjatë dhe mund të vazhdojnë të jenë edhe më tej. Dyja palët përfitojnë nga kjo”, theksoi mes tjerash Mascherano në lidhje me kontratën e argjentinasit.
