Michael Flynn dha dorëheqjen si këshilltar i sigurisë kombëtare mbrëmjen e së hënës, duke lënë vakant një nga postet më të rëndësishme në administratën e Shtëpisë së Bardhë.
Sipas raportimeve të CNN-it, presidenti Donald Trump i ka kërkuar gjeneralit në pension Keith Kellogg, dikur shef i personelit të Këshillit të Sigurisë, për të marrë përkohësisht këtë detyrë.
Por Kellogg ishte në garë për të marrë këtë post me kohë të plotë, sikurse dhe gjenerali në pension David Petraeus dhe ish-nënadmirali Bob Harward, ka thënë një burim për CNN dhe tani ata janë në garë sërish.
Njësoj si Flynn, Kellogg është një ish-gjeneral me 3 yje, që u tërhoq dhe vendosi të shërbejë në administratën Trump.
Ai punoi nën urdhërat direkte të Flynn derisa ky i fundit dha dorëheqjen, ndërsa më herët kishte punuar si këshilltar për politikën e jashtme të Trump gjatë fushatës elektorale.
Edhe Petraeus është një ish-ushtarak, që ka shërbyer për vite të tëra nën armë, përpara se të arrinte shkëlqimin, por edhe rënien në karrierën e tij gjatë administratës Obama.
Petraeus ishte një nga figurat ushtarake kyçe që përgatiti qasjen e Shteteve të Bashkuara ndaj konflikteve në Lindjen e Mesme. Gjithashtu, ai fitoi shumë popullaritet për punën që bëri në Irak për të frenuar dhunën që kishte kapluar vendin nga fundi i viteve 2000.
Më pas ai udhëhoqi trupat në Afganistan dhe më vonë u emërua nga nga presidenti Obama në krye të CIA-s. Por shumë shpejt do të jepte dorëheqjen nga kjo detyrë për shkak të një afere jashtëmartesore me biografen e tij.
Edhe nënadmirali Harward ka shërbyer në marinë, madje në radhët e njësisë elitë Navy Seal. Gjatë administratës Obama ai shërbeu si numri dy i Qendrës së Komandës së SHBA.
Pas tërheqjes nga ushtria, ai shërbeu si drejtues në kompaninë amerikane të armatimeve “Lockheed Martin UAE”.
Disa email-e të publikuara nga “Washington Post” tregojnë korrespondencën mes Harward dhe njeriut që tashmë është sekretar i Mbrojtjes, gjenerali James Mattis. Ky i fundit thotë për të: “Është i shkëlqyer, edhe si SEAL”./ Top Channel
