Besa Llugiqi të paktën dy herë do të udhëtojë drejt Bullgarisë brenda dy muajsh. Sopranoja e njohur kosovare në fund të janarit do ta reprizojë rolin kryesor të operës “La traviata” në Shtëpinë Shtetërore Operistike, që ndodhet në qytetin Stara Zagora.
E një muaj më vonë do të ndalet në Sofje për të incizuar CD-në e parë promovuese me një orkestër me nam.
Llugiqi – emër tashmë i njohur për audiencën bullgare që përcjell muzikën klasike – do të interpretojë disa arie në përcjellje të Orkestrës Simfonike të Radios Kombëtare Bullgare, që vepron në Sofje dhe koncertet kryesisht i mban në Sallën Koncertale të Bullgarisë.
Orkestra ka pasur incizime me studiot më të njohura të incizimeve në Bullgari e më gjerë, përfshirë “Phonic”, “Belgium”, “Sound Product Netherlands”, “Pyramid Record” në New York e të tjera.