Nga dy sulme me bomba në Stamboll janë vrarë 38 vetë dhe plagosur 166 të tjerë, ka njoftuar qeveria e Turqisë.
Autoritetet sot kanë shpallur Ditë Zie Kombëtare, pasi një makinë – bombë e ka goditur një automjet policor, ndërsa një sulmues vetëvrasës ka sulmuar jashtë një stadiumi futbollistik mbrëmë vonë, dy orë pas ndeshjes së dy ekipeve më të mira në Turqi.
Në mesin e të vrarëve janë edhe 30 policë, ka njoftuar sot ministri i brendshëm, Suleyman Soylu.
Ai ka thënë se janë arrestuar 13 persona të dyshuar.
Zyra e presidentit të Turqisë, Recep Tayyip Erdogan, tha se ai e ka anuluar vizitën në Kazakistan të paraparë për sot.
Asnjë grup nuk e ka marrë përgjegjësinë e menjëhershme për këtë sulm, por ministri Soylu tha se beson se për këto sulme janë përgjegjës militantët kurdë.
Raportohet se një valë e sulmeve me bomba në Turqi këtë vit ishin ndërmarrë nga Partia Punëtore e Kurdistanit dhe grupi ekstremist, Shteti Islamik.
