Galeria Kombëtare e Kosovës shpalli emrat e Jurisë së pavarur profesionale për zgjedhjen e fituesit në ekspozitën AR – 2016
Prishtinë, 09 nëntor 2016 – Galeria Kombëtare e Kosovës shpalli emrat e Jurisë së pavarur profesionale për zgjedhjen e fituesit në ekspozitën AR – 2016.
Juria e përbërë nga:
Sislej Xhafa, i lindur në Pejë, artisti i cili jeton dhe vepron në New York. Është i njohur për hetimin e tij artistik të realitetit social, ekonomik dhe politik të ndërlidhur me kompleksitetet e ndryshme të shoqërisë moderne.
Adrian Paci, i lindur në Shkodër, Shqipëri, Adriani studioi pikturën në Akademinë e Arteve në Tiranë. Në vitin 1997 ai u zhvendos në Milano ku edhe jeton e punon edhe sot.
Maksut Vezgishi, është arkitekt, dhe artist vizuel, që jeton dhe punon si artist i pavarur në Bruksel.
Në tetor të këtij viti, Galeria Kombëtare e Kosovës shpalli emrat e pesë finalistëve të edicionit të parë “Artistët e Rinj”: Jetullah Sylejmani, Luan Bajraktari, Bujar Sylejmani, Agron Blakçori, dhe grupi Haveit të cilët u mbështeten në realizimin e punëve për ekspozitën finale. Finalistët u përzgjodhën nga juria selekcionuese e përbërë nga zyrtarja për kulturë në Ambasaden Franqeze Natacha Guilbeau, artisti Leutrim Fishekqiu dhe artisti, Ibro Hasanoviq. Ekspozita Artistët e Rinj do të hapet nesër (të enjten) më datë 10 nëntor në orën 19:00 në Galerinë Kombëtare të Kosovës dhe do të qëndrojë e hapur deri më datë 10 dhjetor 2016, ku do të shpallet edhe fituesi I kësaj gare nga Juria.
Ekspozita u kurua nga Mehmet Behluli dhe Lulzim Zeqiri.
