Lajme

“Rama ndërron ‘bletët’, por Tatimet e Doganat janë ‘koshere’ korrupsioni”

By Dijart Dyla

September 24, 2016

Një ditë pas ndryshimeve të bëra nga Kryeministri i vendit Edi rama në Tatime e Dogana, ka reaguar partia Demokratike e cila ka thënë se Rama po ndërron “Bletët’ por Doganat e Tatimet vijojnë që të mbeten koshere korrupsioni për qeveritarët. Partia Demokratike, përmes një deklarate të bërë nga selia blu nga Dorjan Teliti ka thënë se qeveria e kryeministri Edi Rama në tre vjet pushet e ka zhytur vendin në korrupsion dhe klientelizëm. Këshilltari i PD për Ekonominë, Dorjan Teliti zëvendësimin e emrave në tatime dhe dogana e ka konsideruar një formalitet që nuk ndryshon gjendjen në të cilën janë të zhytur këto institucione, duke theksuar se në Dogana e Tatime ëhstë krijuar gropa më e madhe që ka sot ekonomia shqiptare.

Deklarata e plotë

Edi Rama vendosi të ndërrojë bletët e tij punëtore në Tatime e Dogana, po këto institucione në këto tre vite mbeten dhe do vijojnë të jenë koshere të evazionit, korrupsionit dhe militantizmit partiak, të punësimit me listë sipas influencës së deputetëve dhe ministrave.

Pavarësisht nëse quhen Briseida, Elisa, apo Vasilika, tatimet e doganat janë në dispozicion të klaneve të pushtetit dhe zgjedhjeve që po vijnë.

Vetëm për Gushtin rreth 35 milion dollarë i munguan arkës së shtetit, duke qënë gropa më e madhe e bërë në një muaj të vetem në vitet e fundit.

35 milionë dollarë të vjedhura, që nuk shkojnë për rrugë, shkolla, ndihmë ekonomike, por përfundojnë në xhepat e qeveritarëve dhe klientëve të tyre.

Taksat në dogana dhe tatime po kthehen në një pazar ku negociohen ryshfetet për të dërguarit e Ramës, dhe nuk shihen si detyrim ligjor.

Megjithë shkallën e lartë të evazionit, Rama nuk ndërron model, dhe në vend se bletët e tij të mbajnë përgjegjësi, i gradon më tej ato duke i bërë zëvendësministre.

Ndërkohë, vjedhjen në dogana e tatime e mban sërish nën kontroll, në duar të sigurta duke ua besuar këshilltareve të tij.

Ndryshimet e Ramës janë thjesht një makijazh, po vjedhja dhe hajdutëria në tatime e dogana nuk ndryshon.