Në momentin kur pritej votimi i demarkacionit pas konfirmimit të numrave nga ana dy partnerëve të koalicionit, PDK dhe LDK, një veprim i paparashikueshëm vjen nga Lista Serbe, e cila me urdhër të Beogradit ka vendosur të bojkotojë seancën e së enjtes për votimin e marrëveshjes së demarkacionit.
Por sonte kundër demarkacionit ka dalë edhe një parti e koalicionit qeveritar, Partia e Drejtësisë, e cila në Kuvend përfaqësohet nga deputetja Labinotë Demi-Murtezi, shkruan lajmi.net.
Një situatë e tillë krijon paqartësi edhe më të mëdha nëse koalcionin PDK-LDK i ka votat e mjaftueshme për ratifikimin e marrëveshjes së demarkacionit më Malin e Zi. Që marrëveshja të jetë fuqiplotë duhen votat e dy të tretave të deputetëve, minimum 80 vota.
Por, si qëndron pozita me numra në Kuvend? Sipas ndarjes në Kuvend, mazhoranca i ka 84 deputetë, opozita 30, kurse gjashtë deputetë janë pa grup.
Numri i deputetëve sipas partive:
Pozita:
PDK: 34 deputetë
LDK: 33 deputetë
Lista Serbe: 11 deputetë
Grupi 6 plus: 6 deputetë
Gjithsej: 84 deputetë
Opozita:
LVV: 16 deputetë
AAK: 8 deputetë
Nisma: 6 deputetë
Gjithsej: 30 deputetë
Pa grup janë 6 deputetë
Nëse numrit të deputetëve të shumicës ia shtojmë votat e 6 deputetëve pa grup, ky numër shkon në 90.
Mirëpo, nëse deputetët e Listës Serbe nuk marrin pjesë në seancë, atëherë dështimi i demarkacionit është i qartë, sepse në asnjë variant nuk mund të bëhen 80 vota.
Që gjërat të komplikohen edhe më shumë për pozitën, janë deklarimet e disa deputetëve të koalicionit të cilët qe një kohë janë deklaruar se do të votojnë kundër demarkacionit. Në këtë listë janë Shpejtim Bulliqi dhe Adem Salihaj i LDK-së, Nait Hasani dhe Raif Qela nga PDK.
Seanca për ratifikimin e demarkacionit është caktuar të nis nesër në ora 11:30, kurse lajmi.net merr vesh se pak kohë para fillimit të seancës, pritet që koalicioni qeveritar të vendosë se si do të procedojë tutje.