U bënë disa vite që Zajmina Vasjari ka eksperimentuar me zhanre të ndryshme muzikore dhe është përpjekur të sjellë një frymë të re në muzikë, edhe pse fillimisht u bë e njohur nga spektaklet e bukurisë.
Por pas shumë viteve investim në muzikë, në një treg që ende nuk e ka gjetur veten, Zajmina, në prag të 30-vjetorit të saj, ka vendosur të tërhiqet dhe të krijojë baza më të forta për të ardhmen. Pas diplomimit në degën e Arkitekturës, ajo sapo ka përuruar biznesin e saj të ri, një dyqan me fustane eventesh.
Edhe eksperimenti me biznesin nuk është i pari për Zajminën, duke marrë parasysh që disa vite më parë hapi një dyqan veshjesh nusërie dhe më vonë edhe një tjetër me shitjet e produkteve shërbim taksi, megjithatë gjithçka këtë herë do të jetë ndryshe, meqenëse vetë Zajmina do të ketë përkushtimin maksimal.
Në një kohë kur të gjitha koleget e saj këngëtare, verën e kanë pasur të ngjeshur me koncerte të shumta muzikore brenda dhe jashtë vendit, siç shkruan “Panorama Plus”, Zajmina të gjithë këtë periudhë e ka kaluar në Tiranë duke iu dedikuar tërësisht biznesit, madje ajo ka nisur edhe një fushatë intensive, duke ftuar mikeshat e saj më të ngushta të reklamojnë fustanet e saj me anë të fotove të ndryshme në rrjetet sociale. Mes tyre, edhe emra si Rezarta Shkurta, Anjeza Branka, Françeska Jaçe, Kristin Prengaj etj.
