Sot 18 vjet më parë, ishte rrethuar nga forcat serbe, familja Salihaj në Bellopjë të Istogut. Ata kishin kuptuar se kjo familje atdhetare, kishte në radhët e UCK-së, në Brigadën 121 ‘Arben Haliti”, gati të gjithë pjesëtarët e saj.
Për këtë arsye, forcat serbe në mënyrë tinëzare, duke rrethuar shtëpinë, bllokuan të gjithë anëtarët e familjes, mbi të cilët filluan edhe sulmin.
Rezistenca e kryefamiljarit Isa Salihaj, së bashku me djem e nipa, ishte e fortë. Ata arritën që sulmit të forcave serbe t’i bëjnë ballë për gati 24 orë.
Por me 29 gusht të vitit 1998, ata ranë duke lënë prapa vetës shumë aksione të kryera, e ku më i madhi njihet ai në Belicë.
Në këtë betejë grykë për gryke me forcat serbe, ranë babai Isa Salihaj, së bashku me tre djemtë e tij, Shabanin, Milaimin e Abedinin si dhe nipat (djemtë e djalit Shabanit), Hysenin, Arbenin e Hysniun.
Në këtë betejë të familjes Salihaj përballë forcave të një shteti, u vra edhe gruaja e Shabanit, Fatimja.
E përveç tyre, bashkë me dajë të cilëve nuk iu nda asnjëherë ishte edhe Nazmi Gashi nga Ozdrimi i Drenicës.
Ndonëse në moshë të re, edhe ai ishte pjesëtar i UCK-së. Por ai zgjodhi rrugën e tij, e cila për të mbërritur tek liria, dha gjakun e tij.
Kështu, Nazmiu, u vra bashkë me dajë, për të lënë prapa krenarë të gjithë ata që patën fatin ta njohin.
Ai prehet i qetë në varrezat e dëshmorëve të familjes Salihaj në Bellopojë, bashkë me dajë, duke mos u ndarë nga ta as në botën tjetër.
