Vetëm sëmundje, dhe dhimbje në shpirt, i kanë mbetur një nëne kosovare që jeton e vetme, meqë burrin dhe katër djemtë nuk i ka më. Disa ia vranë e disa nga ta ende janë të zhdukur.
Kjo është Ferdonija, një nga nënat në Kosovë e cila përveç krejt të tjerash ka probleme edhe me pronën, vëllezërit e burrit sikur po pretendojnë se kanë të drejtë mbi pronën e saj.
Të zhdukurit, dhimbja e familjarëve, problemet me pronën, e shumëçka tjetër janë përmbledhur në filmin “Ferdonija” që është shfaqur në edicionin e XV të festivalit të filmit dokumentarë dhe të shkurtër DokuFest.
I gjatë 30 minuta, ai paraqet saktë gjendjen në Kosovë edhe 17 vjet pas luftës së fundit.
Regjisorët Gazmend Bajri dhe Shkurte Dauti thonë se edhe për ta ka qenë shumë e vështirë edhe si temë por edhe si realizim.
Në natën e shfaqjes së filmit të gjithë u panë me lot, e si rrallëherë, vet personazhi, Ferdonija ishte e pranishme, raporton lajmi.net
Të gjithë u ngritën në këmbë në respekt për forcën që ajo gjen për jetën, teksa në film shfaqet se si te varri ju fletë secilit mashkull të familjes së saj, si ju tregon dy prej djemve se gratë e tyre tashmë janë martuar dhe se kjo është e lumtur për atë gjë.
“Ky film besoj se do të ndikojë shumë kur të dalë jashtë Kosovës, pasi që besoj se të gjithë atëherë do ta kuptojnë dhimbjen në të cilën ne kemi kaluar e kalojmë”, tha Ferdonije Qerkezi.
“Ka qenë goxha vështirë me u përballë me këtë rrëfim për shkak se edhe unë kam pasur trauma të luftës, por në këtë rast veç kalohet sepse koha që kemi kaluar me zonjën Ferdonije më ka ndihmuar që edhe dhimbjen time në njëfarë mënyrë ta harroj”, shpjegoi Gazmend Bajri.
Filmi është në garën kombëtare.