Kryetari i Nisma për Kosovën, Fatmir Limaj, thotë se marrëveshjen për Demarkacionin duhet t’i lihet ekspertëve, në mënyrë që ta riformulojnë zgjidhjen e kësaj çështjeje, e më pas t’i pranojmë rezultatet e ekspertëve.
Limaj theksoi se kërkesa kryesore në takimin e sotëm me ambasadorët e Quint-it, ishte që, Demarkacioni të përmbyllet njëherë e mirë dhe Kosova të çlirohet nga ky problem.
“Natyrisht që ne jemi të interesuar që fqinjët tanë me qenë stabil, por para së gjithash, neve na intereson siguria, stabiliteti dhe mbrojtja e Kosovës”, tha Limaj, në emisionin “Rrokum Roll”, duke shtuar se “nuk duhet të ketë shqetësime më shumë me stabilitetin e Malit të Zi, se sa me të Kosovës, siç po bën Qeveria, që ishte edhe reflektim nga takimi që patëm me Ambasadoret e Quinit-it”.
Lideri i Nismës për Kosovën tha se në debatin që është zhvilluar për Demarkacionin, ka parë njerëz eminentë, që ishin kundër marrëveshjes aktuale.
Ai ka thënë se deputetet nuk kanë pasur informacion për punën e Komisionit Shtetëror, pasi që puna ishte kryer, pa u njoftuar kurrë parlamenti. Kjo, sipas Limajt, tregon më së miri trajtimin qe bën Qeveria e Kosovës.
“Deputetet kanë mbajtur fjalime 5 orë pa nevojë. Me një fjalë janë mashtruar”, ka sqaruar Limaj.
Limaj ka thënë në vazhdim se, ky nuk është shtet ligjor, derisa vazhdojnë të veprojnë kështu, sepse çdo gjë është në agjende të veprimeve individuale të tyre.
Ai ka përsëritur se në asnjë mënyrë nuk duhet të votohet ky variant i Demarkacionit dhe pret që deputetet mos ta votojnë diçka, në të cilën ka dilema.
Limaj ka thënë se muajt e fundit ka vërejtur një përpjekje që opozitarët të trajtohen si antiamerikanë e antievropiane. “Ndërsa, në fakt, pikërisht mënyra se qysh qeverisin ata dhe qasja e tyre ndaj shtetit, janë antiamerikane e antievropiane’, tha Limaj.