Presidenti turk Rexhep Taip Erdogan, në një intervistë të dhënë për median italiane “Rai Neës 24”, ka deklaruar se hetimi i djalit të tij nga autoritetet italiane në Bolonjë, mund të ndikojë në marrëdhëniet mes dy shteteve.
Gjithashtu Erdogan ka kritikuar zyrtaren e Bashkimit Evropian, Federica Mogherini. “Ajo nuk duhet të kishte folur nga jashtë. Mogherini duhet të vinte në Turqi para së gjithash”, tha ai.
Duke folur sërish për Komisioneren e Lartë të Bashkimit Evropian, Erdogan ka pohuar: “Nëse bombardohet parlamenti italian, çfarë ndodh? Mogherini, që është italiane si reagon? Do thoshte që e kanë bërë mirë që e kanë bombarduar? Do të ishte e shqetësuar në lidhje me pasojat? Perëndimi është në anën e demokracisë apo të grushtit të shtetit? Unë mendoj se është në anën e grushtit të shtetit. Kur në Paris vdesin 5-6 vetë Mogherini shkon me vrap në Francë. Turqia u përball me një goditje të rëndë ndaj demokracisë dhe askush nuk erdhi për ta vizituar”.
Sa i takon çështjes së djalit të tij Bilal, Erdogan ka shpjeguar: “Duhet të kthehet në Bolonjë për të përmbyllur doktoraturën. Në atë qytet më quajnë diktator dhe i bëjnë lavde Partisë Punëtore të Kurdistanit. Pse Italia nuk ndërhyn? Ky është shteti i së drejtës? Im bir është një njeri shumë i mirë që akuzohet për pastrim parash. Më mirë të merren me mafien”, shtoi presidenti turk.