Policia Speciale e Armenisë është përleshur me përkrahësit e një grupi të armatosur i cili është ngujuar me pengje brenda një stacioni të policisë në kryeqytet, Yerevan.
Dhjetëra protestues janë lënduar, ndërsa tre persona të armatosur janë plagosur në përleshjet e më hershme, raporton BBC, përcjell Express.
Ky grup i armatosur e ka zaptuar stacionin e policisë para gati dy javëve duke kërkuar lirimin e të burgosurve politikë, përfshirë liderin opozitar Jirair Sefilian.
Sefilian e ka kritikuar ashpër presidentin armen, Serge Sarkisian, për mënyrën se si e ka trajtuar konfliktin Nagorno-Karabakh.
Policia ka përdorur shkopinj gome dhe granata për trullosje kundër protestuesve të cilët brohorisnin “Lirojeni Armeninë e pavarur” dhe “Serge, shko!”
Agjencia armene e lajmeve Sputnik, ka thënë se hiç më pak se 60 persona janë lënduar në përleshje dhe rreth 40 të tjerë janë duke u trajtuar në spital.
Raportohet se më shumë se 100 njerëz janë arrestuar.