Mbrojtësi 33-vjeçar është përzgjedhur si një nga tre lojtarët më të fortë të botës dhe kjo jo nga një media dosido, por nga televizioni amerikan, ESPN.
Cana është bërë pjesë e një grupi ekskluziv futbollistësh me karakter të ashpër dhe tepër ndikues për skuadrat e tyre. Kjo u pa që në fillimet e karrierës, tek Paris SG, dhe më pas tek Marseja.
Gjakovari u bë kapiten i marsejezëve, diçka shumë prestigjioze pasi ishte shiriti në klubin e vetëm francez që ka fituar Ligën e Kampionëve.
Gjithsesi, aftësia e tij udhëheqëse nuk është vënë kurrë në dyshim. Ajo duket jo vetëm në fushën e lojës, por edhe në çdo seancë stërvitore, ku trajnerët e Shqipërisë e kanë pasur kapitenin si krahun e tyre të djathtë.
Cana lë pas në renditjen e ESPN-së lojtarë tepër të ashpër si Kielini, Bruno Alvesh, Pepe, De Jong apo Diego Godin, ndërsa përpara tij janë vetëm Leonardo Bonuçi e Gari Medel.
