Presidenti i Shteteve të Bashkuara të Amerikës, Barack Obama ka shprehur bindjen e tij se marrëdhëniet mes vendit të tij dhe Britanisë së Madhe do të jetë po kaq speciale edhe me Teresa May si kryeministre.
Në një konferencë për median, zëdhënësi i Shtëpisë së Bardhë tha se Obama është i bindur se ai dhe pasardhësi i tij do të ruajnë dhe çojnë përpara lidhjen e ngushte mes dy vendeve.
Presidenti amerikan Barack Obama është i bindur se marrëdhënia speciale mes Shteteve të Bashkuara të Amerikës dhe Britanisë së Madhe do të vijojë edhe pasi Teresa May të marrë detyrën e kryeministres së vendit. Kjo është deklarata e Shtëpisë së Bardhë pas tërheqjes së ministres së energjisë Andrea Leadsom, e cila la të vetme në garë ministren e Brendshme.
“Presidenti është plotësisht i bindur se ai dhe pasardhësi i tij do të jetë në gjendje për të koordinuar në mënyrë efektive jo vetëm për ta mbrojtur, por edhe të çuar përpara marrëdhënien e veçantë mes dy vendeve tona”, tha zëdhënësi i Shtëpisë së Bardhë, Josh Earnest në një konferencë për gazetarët.
Theresa May do të jetë kryeministrja e ardhshme e Britanisë, gruaja e dytë në historinë e Britanisë që do të drejtojë vendin pas Margaret Thatcer. May ka marrë mbështetjen e gjerë të partisë konservatore për të drejtuar negociatat e daljes me bashkimin evropian. Edhe pse bëri një fushatë pro qëndrimit të Britanisë së Madhe në union, May tha dje në një reagim se Brexit do të thotë Brexit.
