Qendra Kosovare për Rehabilitimin e të Mbijetuarve të Torturës ka organizuar një kampanjë me rastin e Ditës Botërore të viktimave të dhunës për të kërkuar të drejtat e të dhunuarve gjatë luftës së fundit në kosovë.
Drejtoresha e kësaj qendre, Feride Rushiti tha se përkundër vullnetit politik, në Kosovë ende nuk është firmuar komisioni për verifikimin dhe kompensimin e të dhunuarve gjatë luftës.
Përmes aktivitetit “Dëgjo zërin tim”, kjo qendër ka shënuar 19 Qershorin, Ditën Ndërkombëtare të Kombeve të Bashkuara për eliminimin e dhunës seksuale në konflikt dhe 26 Qershorin, Ditën Ndërkombëtare të Kombeve të Bashkuara në Mbështetje të Viktimave të Torturës.
Aktiviteti “Dëgjo zërin tim” ka për qëllim sensibilizimin e opinionit kosovar, në veçanti atij institucional, për gjendjen dhe të drejtat e të mbijetuarave të dhunës seksuale gjatë luftës në Kosovë.
