Kryetarja e komunës së Gjakovës Mimoza Kusari – Lila, ka vizituar sot studentët e shtruar në Repartin Infektiv të Spitalit Regjional “Isa Grezda”, të cilët dyshohet se u helmuan një ditë më parë në Konviktin “Sadik Stavileci” në Gjakovë.
Në biseda me mjekët kujdestarë por edhe me secilin prej studentëve, kryetarja Mimoza Kusari – Lila është interesuar për gjendjen e tyre ndërsa u ka uruar shërim sa më të shpejtë dhe rikthim në obligimet e veta studentore.
Lidhur me rastin e dyshuar të helmimit të këtyre studentëve, sipas një njoftimi të kësaj komune, kryetarja Mimoza Kusari – Lila ka thënë se komuna e Gjakovës dhe ajo si kryetare janë duke e trajtuar seriozisht këtë rast, ndërsa të njëjtin trajtim ka kërkuar që ta kenë edhe organet tjera përgjegjëse, të cilave ligjërisht u takon të merren me të.
“Kusari – Lila ka kërkuar që hetimet rreth këtij rasti të shkojnë deri në fund, në mënyrë që të dihet saktësisht se si ka ndodhur dhe nga cilët shkaktarë ka ndodhur”, thuhet në njoftim.
“Ndryshe, komuna e Gjakovës ka marrë vendim që mensa e studentëve në Konviktin “Sadik Stavileci” të mbyllet përkohësisht deri në përfundimin e të gjitha hetimeve dhe analizave”, përfundohet në njoftimin e Komunës së Gjakovës.
