Kombëtarja shqiptare e futbollit ka qënë këto ditë në qendër të vëmendjes së revistës javore të UEFA-s, e cila është fokusuar në historikun e kombëtares kuq e zi.
Trajneri Giani De Biazi, kapiteni Lorik Cana dhe sulmuesi Sokol Cikalleshi, kanë qenë tre personazhet e revistës, ku kanë treguar emocionet e tyre rreth pjesmarrjes për herë të parë në një kompeticion kaq të rëndësishëm futbollistik.
De Biazi
“Mora një ofertë nga FSHF dhe e mbërtheva me të dyja duart. E dija që ishte një hap drejt së panjohurës dhe që më priste një punë e vështirë, por unë jam një trajner që s’kam frikë nga sfidat. E nisëm me fitore në Portugali dhe kjo na shtoi besimin se së bashku mund të arrijmë gjëra të mëdha.Duhet të ishim shumë të motivuar dhe të shmangnim mendimet se do të ishte e pamundur për ne. Gjëja më e mirë ishte se kur lojtarët më panë, vendosën dorën në zemër dhe thanë: ‘respekt’. Mendoj se ajo është gjëja më e bukur për mua, sepse ata kuptuan se pas gjithë këtyre rezultateve, unë kisha dhënë ndihmën time në arritjen e objektivit madhor”, ka rrëfyer trajneri kuqezi.
Cana
“Në vendin tonë e quajmë ‘toka e shqiponjës’. Është një simbol që e kemi në flamurin tonë dhe mbetet i pavdekshëm”, thotë fillimisht kapiteni i Shqipërisë.
Ëndrra ime e madhe ka qenë që me ekipin e kombit tim të kualifikohem në një event si kampionati europian. Kur fituam në Armeni dhe vulosëm kualifikimin, aty ishte shkarkimi i gjithë emocioneve, lumturisë, stresit, dashurisë, pasionit dhe zhgënjimeve që kam përjetuar në 13 vite me Kombëtaren. Kur arbitri mbylli ndeshjen, nuk mund të përmbahesha.
Tashmë në Francë do jenë shumë tifozë shqiptarë dhe besoj se do të kalojmë diçka të paharrueshme. Dhe pse jo edhe ne të themi fjalën tonë. Kemi cilë- si dhe mbi të gjitha dëshirë të madhe për suksese të tjera”.
Cikalleshi
“Që para fillimit të eliminatoreve, në skuadër ndihej diçka ndryshe, duke filluar nga harmonia dhe besimi që kishim te forcat tona. Duke futur këtu edhe mbështetjen e mrekullueshme të tifozëve tanë, ne besonim se mund të bënim diçka të madhe. Fituam në Portugali dhe ne kemi një shprehje: ‘fillimi i mbarë është gjysma e punës’. Pas fitores në Armeni, kur mbërritëm në Tiranë, të gjithë njerëzit kishin dalë në rrugë dhe kjo ka qenë mrekullia vetë”.
