Mali i Zi dhe NATO-ja sot në Bruksel e kanë nënshkruar protokollin për pranim në aleancë, duke e hapur rrugën që Mali i Zi të bëhet anëtari i 29-të i aleancës ushtarake.
Në ceremoninë e nënshkrimit në selinë e NATO-s në Bruksel, ka marrë pjesë kryeministri i Malit të Zi, Millo Gjukanoviq.
Sekretari i përgjithshëm i NATO-s, Jens Stoltenberg, tha se kjo paraqet “fillim të një kaptine të re të sigurt” në historinë e Malit të Zi. Mali i Zi do të marrë pjesë në takimet e NATO-s në cilësinë e vëzhguesit, derisa të gjitha vendet anëtare të NATO-s ta ratifikojnë protokollin e pranimit.
Zoti Gjukanoviq tha se Mali i Zi shpreson të bëhet anëtar i rregullt i NATO-s deri në mes të vitit të ardhshëm, duke u bërë vendi i tretë ballkanik, që i bashkohet NATO-s, pas Shqipërisë dhe Kroacisë.
Rusia ka shprehur përkushtim për përgjigje ndaj anëtarësimit të Malit të Zi, për shkak të, siç thotë Moska, shqetësimeve për lëvizjen e shtuar të NATO-s kah kufiri i Rusisë, duke e vlerësuar këtë si kërcënim.