Gjatë një takimi dhe pritjeje që ministri Hyseni pati sot me Komisionerin Evropian për Migrim, Punë të Brendshme dhe Shtetësi, Dimitris Avramopoulos, u bë edhe njoftimi zyrtar se qytetarët e Republikës së Kosovës, do të mund të udhëtojnë pa viza në vendet e zonës Schengen së shpejti.
Pas takimit i cili u zhvillua në atmosferë shumë të përzemërt, ministri Hyseni dhe Komisioneri Avramopoulos dolën në një konferencë për media për të kumtuar zyrtarisht rekomandimin për heqjen e vizave, thuhet në kumtesen dërguar mediave, njofton MPB.
Ministri Hyseni poashtu, sot takoi Ministrin e Punëve të Brendshme të Belgjikës Jan Jambon, me të cilin biseduan gjerësisht çështjet nga fushëveprimi i ministrive të brendshme.
Ministri Hyseni mori përkrahjen e plotë të Ministrit belg, për anëtarësimin e Kosovës në INTERPOL, si dhe për procesin e liberalizimit të vizave.
Në ketë takim u bisedua edhe për nevojën e intensifikimit të bashkëpunimit midis të dyja vendeve.
Ministri Hyseni gjithashtu morri pjesë në drekën e shtruar nga kryetari i Partisë Popullore Evropiane (PPE), Joseph Daul dhe në Parlamentin Evropian mbajti një fjalë rreth perspektivës evropiane të Kosovës dhe Ballkanit, konferencë kjo e organizuar nga Grupi i PPE në Parlamentin Evropian.