Vetëm dy ditë pasi ishin shpallur në kërkim për mashtrim financiar në shuma të mëdha monetare, Luli Makashi dhe vajza e saj Adeila kanë hyrë në dyert e policisë së Tiranës të prangosura, rreth orës 00 e 40 minuta të së enjtes.
Sektori Kundër Krimit Ekonomik dhe Interpol Roma arritën të bindnin Departamentin e Policisë Kanadeze për ndalimin dhe më pas riatdhesimin e dy të akuzuarave.
Sipas burimeve mësohet se në momentin që nënë e bijë kanë zbritur në Aeroportin e Montrealit, ato janë ndaluar dhe iu është bërë me dije anulimi i vizave 10 – vjeçare, që kishin në pasaporta.
Nga hetimet janë konstatuar 150 aplikime, shumica prej të cilave për viza pune në Kanada.
Ndërkohë, ka rezultuar se Luli dhe Adeila Makashi, për sigurimin e këtyre vizave kishin lidhur kontrata me kompani dhe kolegje të ndryshme në Kanada, Amerikë, Angli dhe Australi.
51-vjeçarja mësohet se bashkëpunonte dhe me disa avokatë të emigracionit në Shtetin e Kanadasë, ku njëri prej tyre do të shpallë kandidaturën për deputet, në zgjedhjet e ardhshme në qytetin e Montrealit.
Prokuroria dhe Policia po punojnë për identifikimin edhe të shtetasve të tjerë të përfshirë në këtë skemë mashtrimi.
Makashi ia kishte shitur kompaninë për vetëm 1 euro bashkë me borxhe dhe detyrime Klevis Rreshkës dhe më pas ishte larguar nga Shqipëria, duke zbrazur të gjitha llogaritë bankare të firmës.