Vuçiq një ditë para takimit në Bruksel thotë se nuk u beson shqiptarëve

​Kryeministri i Serbisë, Aleksandar Vuçiq, ka deklaruar se e ka humbur besimin ndaj Prishtinës dhe për këtë arsye vazhdimi i dialogut në Bruksel do të jetë shumë i vështirë.

Ai ka shtuar se në rend të parë pret mesazh të qartë në BE sa i përket përdorimit të armëve.

“Dëshiroj t’i lus zyrtarët e BE-së që mos t’i ofrojnë mbështetje përdorimit të armëve atje ku nuk e kanë vend, kurse gjitha të tjerat, temat tjera, të arrihen përmes rrugëve tjera”, ka thënë kryeministri serb në Beograd, një ditë para takimit të nivelit të lartë me palën kosovare në Bruksel.

“E kam humbur besimin në përfaqësuesit shqiptarë… Qysh mundesh dikujt t’i besosh kur flisni bukur fillimisht, e më pas dikush në mëngjes i dërgon 14 tanke dhe thotë hyni ku të doni”, ka thënë Vuçiq.

Ai përsëri ka thënë se Kosova “nuk duhet të luaj me mjete dhe me armë”.

“Nga takimi i nesërm nuk pres shumë, por pres qetësim të situatës dhe mesazhe të qarta… Pres bisedime të vështira, ndërsa secili rezultat që arrihet është i mirë”, ka thënë ai.

Temat
Rajon

Të afërta