Zëvendëskryeministri i parë, Hajredin Kuçi, priti në takim Raportuesen Speciale për të Drejtat Kulturore të Kombeve të Bashkuara, Karima Bennoune.
Zëvendëskryeministri Hajredin Kuçi ka deklaruar se Republika e Kosovës është shtet që garanton të drejta të barabarta të të gjitha komuniteteve, dhe respektimin e të drejtave religjioze dhe kulturore pa diskriminim.
Ai e ka bërë këtë deklaratë gjatë takimit me Raportuesen Speciale të Kombeve të Bashkuara, Karima Bennoune, njofton Kryeministria.
“Mbrojtja e trashëgimisë kulturore në Kosovë garantohet me Kushtetutën e Kosovës, legjislacionin në fuqi dhe ka bazamentin e mbrojtjes qysh në Planin e Ahtisarit. Institucionet e Kosovës janë të përkushtuara që të garantojnë mbrojtjen e trashëgimisë kulturore në Kosovë pa marrë parasysh përkatësinë etnike apo religjioze”, citohet të ketë thënë zëvendëskryeministri Kuçi.
Kuçi dhe Bennoune diskutuan për rëndësinë e kulturës si faktor në krijimin e një ambienti të qetë dhe në harmoni për bashkëjetesë për të gjitha komunitetet. Kuçi potencoi se Qeveria e Kosovës ka perspektivë dhe orientim të qartë proevropian, ku të drejtat kulturore dhe religjioze të të gjitha komuniteteve mbrohen dhe garantohen gjithmonë duke respektuar laicitetin e shtetit.
Raportuesja Speciale e Kombeve të Bashkuara, Karima Bennoune po e viziton Kosovën me kërkesë të Qeverisë së Serbisë.